‘ලියෝ’ චිත්‍රපටයට ලංකාවේ සුරූපිනියක් රංගනයෙන් දායක වේ
දමිළ සිනමාවේ සුපිරි තරුව, තලපති විජේගේ නවතම චිත්‍රපටය ‘ලියෝ’ අද (20) ඉන්දියාවේ පමණක් නොව, රටවල් රැසකද තිරගතවීම් ආරම්භ කර තිබෙනවා.
ලියෝ චිත්‍රපටයට සම්බන්ධවී තිබෙන්නේ, අර්ජුන්, සංජේ දත්, ට්‍රිෂා, ප්‍රියා ආනන්ද්, මන්සූර් අලිඛාන්, ගෞතම් වාසුදේව් මෙනන් ඇතුළු ජනප්‍රිය දක්ෂ ප්‍රවීණ රංගන ශිල්පීන් රැසක්.
ඊට අමතරව, ඉන්දියාවේ ‘බිග් බොස්’ රියැලටි වැඩසටහන හරහා අතිශය ජනප්‍රියවූ සුරුපිනී ජනනි කුනසීලාන්ද ‘ලියෝ’ චිත්‍රපටයට එක්වි තිබීම විශේෂත්වයක්.
යාපනයේ උපන්, මාධ්‍යවේදිනියක ලෙස කලක් රැකියාවක් කළ ජනනි නම් තරුණිය ‘ලියෝ’ චිත්‍රපටයට තෝරා ගැනීම සිදුවී ඇත්තේ ‘බිග් බොස් 6’ රියැලිටි වැඩසටහන හරහා ලැබුණු ජනප්‍රියත්වය නිසා බව පවසනවා.
සමාජ මාධ්‍ය ඔස්සේ සටහනක් තබමින් ජනනි පවසා ඇත්තේ, ‘ලියෝ’ තම පළමු චිත්‍රපටය වන අතර පළමු චිත්‍රපටයේ සුපිරි නළු විජේ සමඟ රගපාන්න ලැබීම ගැන ආඩම්බර වන බවත් ලියෝ චිත්‍රපටයට තමන් තෝරා ගැනීම සම්බන්ධයෙන් චිත්‍රපටයේ අධ්‍යක්ෂ ලෝකේෂ් කනගරාජ්ට ස්තුති කරන බවටයි.