CCTV මගින් රථ වාහන වැරදි සිදුකළ වාහන 610ක් හඳුනා ගනී
ආරක්ෂිත කැමරා යොදා ගනිමින් රථ වාහන වැරැදි හඳුනාගැනීමේ ක්‍රමවේදය යටතේ ගෙවුණු සතියක කාලයේදී රථවාහන වැරැදි 610 ක් හඳුනාගත් බව පොලිස් සීසීටීවී කොට්ඨාසය පවසනවා.
කොළඹ නගරයේ මංමාවත්වල සවිකර ඇති ආරක්ෂිත කැමරා මගින් රථවාහන වැරැදි හඳුනාගැනීමේ වැඩසටහන වැඩබලන පොලිස්පති දේශබන්දු තෙන්නකෝන් මහතාගේ මූලිකත්වයෙන් ඉකුත් 22 වැනිදා ආරම්භ කෙරුණා.
එම වැඩසටහන ආරම්භ කර අද (29) දින වන විට සතියක කාලයක් ගෙවී අවසන්වී ඇති අතර ඊයේ දින වන විට කොළඹ නගරයේ රථවාහන වැරැදි කළ රියැදුරන් 610 දෙනකු හඳුනාගැනීමට පොලිස් සීසීටීවී කොට්ඨාසයට හැකිව තිබෙනවා.
මංතීරු මාරු කර රිය ධාවනය, විදුලි ආලෝක සංඥාවලට අනුව ධාවනය නොකිරීම, නැවතිය නොහැකි ස්ථානවල රථවාහන නැවැත්වීම, රතු දැල්වී තිබියදී ධාවනය කිරීම ඇතුළු රථවාහන වැරැදි මෙහිදී නිරීක්ෂණය කර තිබෙන බවද සඳහන්.
මෙම වැඩසටහනේ මූලික පියවර ලෙස ආරම්භ කළ නියමු වැඩසටහන යටතේ වැරැදි කළ රියැදුරන්ට අවවාද කිරීම සිදුකෙරුණු අතර එළැඹෙන පළමුවැනිදා සිට දඩ කොළ නිකුත් කිරීමට නියමිත බව පොලිස් සීසීටීවී කොට්ඨාසයේ නියෝජ්‍ය පොලිස්පති තුෂාර ගමලත් මහතා පැවසුවා.