ශ්‍රී ලංකා – නවසීලන්ත ක්‍රිකට් තරඟාවලි බලන්න ඉන්න අයට පණිවිඩයක්
එළැඹෙන ශ්‍රී ලංකා – නවසීලන්ත ක්‍රිකට් තරඟාවලිය සඳහා මාර්ගගත ක්‍රමවේදය ඔස්සේ ප්‍රවේශපත්‍ර අලෙවිය නොවැම්බර් 6 වනදා සිට අරඹන බව ශ්‍රී ලංකා ක්‍රිකට් ආයතනය පවසනවා.
www.srilankacricket.lk වෙබ් අඩවියට පිවිසීමෙන් අදාළ ප්‍රවේශපත්‍ර මිලදී ගත හැකියි.
මේ අතර කොළඹ 07 විද්‍යා මාවතේ සහ දඹුල්ල ක්‍රිකට් ක්‍රීඩාංගණයේ ස්ථාපිත ප්‍රවේශපත්‍ර කවුළු නොවැම්බර් 07 වනදා සිට විවෘත කෙරෙනු ඇති.
මේ අතර 20යි 20 තරඟ පැවැත්වෙන දිනවලදී දඹුල්ල ක්‍රිකට් ක්‍රීඩාංගණයේ ප්‍රධාන ගේට්ටුව අසලද ටිකට් කවුළුවක් ස්ථාපනය කෙරෙනු ඇති.
නොවැම්බර් 15 වනදා සිට පල්ලෙකැලේ ක්‍රීඩාංගණයේදී ද ප්‍රවේශපත්‍ර අලෙවි කෙරෙන අතර එක්දින ජාත්‍යන්තර තරඟ පැවැත්වෙන දිනවලදී බලගොල්ල අභීත ක්‍රීඩා පිටියේදී ද ප්‍රවේශපත්‍ර මිලදී ගත හැකියි.
ප්‍රවේශ පත්‍ර කවුළු උදෑසන 9 සිට සවස 5 දක්වා විවෘත ව තැබෙන අතර තරඟ පැවැත්වෙන දිනවලදී උදෑසන 9 සිට සවස 8 දක්වා ටිකට් කවුළු විවෘතව තැබෙනවා.