ශ්‍රී ලංකාවේ සාර්ථකම මාධ්‍ය ව්‍යාපෘතියට A+ TV රන් සම්මානයෙන් පිදුම් ලබයි
A Plus TV රූපවාහිනී නාලිකාව විසින් ඉදිරිපත් කළ ‘Little Communicator’ ශ්‍රී ලංකාව තුළ මාධ්‍ය ආයතනයක් විසින් ක්‍රියාත්මක කළ සාර්ථකම මාධ්‍ය හා ප්‍රචාරණ ව්‍යාපෘතියට හිමි රන් සම්මානයෙන් පිදුම් ලැබුවා.
ඒ ශ්‍රී ලංකා ව්‍යාපෘති කළමණාකරණ ආයතනය මඟින් 6 වැනි වරටත් සංවිධානය කළ “ජාතික ව්‍යාපෘති කළමනාකරණ 2023” සම්මාන උළෙලේදීයි.
සම්මාන උළෙල අගෝස්තු මස 16 වැනිදා කොළඹ කිංග්ස්බරි හෝටලයේ දී පැවැත්වුණා.
මෙහිදී කාණ්ඩ 20 ක් යටතේ ශූරතාවට සහ අනුශූරතාවට සම්මාන පිරිනැමූ අතර ව්‍යාපෘති කළමනාකරු ශ්‍රී ලාංකික පුරවැසියෙක් වීම, අනුමත විෂය පථයක්, කාලරාමුවක් සහ අයවැයක් තිබීම සහ මෙම වසරේ මාර්තු 31 වැනිදා වන විට සම්පූර්ණ කළ ව්‍යාපෘතියක් වීම ආදි නිර්ණායක රැසක් මෙම සම්මානය වෙනුවෙන් සලකා තිබෙන බවයි වාර්තා වෙන්නේ.
ශ්‍රී ලංකා ව්‍යාපෘති කළමනාකරණ ක්ෂේත්‍රයේ විශිෂ්ටයන් ඇගයීම මෙම සම්මාන උළලේ අරමුණ වෙනවා.