ඉම්රාන් ඛාන්ට තවත් සිර ද‍ඬුවමක්
ලාහෝර් හි ත්‍රස්ත විරෝධී අධිකරණයක් විසින් ඉකුත් වසරේ මැයි 9 වැනි දින කැරලි කෝලාහලයන්ට අදාළ නඩු 12ක් සම්බන්ධයෙන් පාකිස්ථාන ටෙහ්රීක්-ඊ-ඉන්සාෆ් (PTI) පක්ෂයේ නිර්මාතෘ ඉම්රාන් ඛාන් දින 10ක් රක්‍ෂිත බන්ධනාගාරගත කිරීමට පොලිසියට අවසර දී ඇති බව විදෙස් මාධ්‍ය වාර්තා කරනවා.
එරට ත්‍රස්ත විරෝධී උසාවි අංක 1 හි විනිසුරු කාලිඩ් අර්ෂාඩ්ගේ ප්‍රධානත්වයෙන් පැවති නඩු විභාගයේදී මැයි 9 කැරලිවලට අදාළ නඩු 12 ක් විමර්ශනය කිරීම සඳහා හිටපු අග්‍රාමාත්‍යවරයා දින 30ක ශාරීරික රක්‍ෂිත බන්ධනාගාරගත කරන ලෙස පොලිසිය ඉල්ලා සිට තිබෙනවා.
පොලිසිය විසින් කරන ලද අදාළ ඉල්ලීමට විරුද්ධ වූ ඔහුගේ නීතීඥවරුන් වන අසාර් සිද්දික් සහ උස්මාන් ගුල් ඔහු වෙනුවෙන් පෙනී සිටි අතර, මෙම ක්‍රියාවලිය සඳහා පීටීඅයි නිර්මාතෘවරයා පෞද්ගලිකව ඉදිරිපත් කළ යුතු බව පවසමින් ඉම්රාන් අඩියාලා බන්ධනාගාරයේ සිට වට්ස්ඇප් හරහා වීඩියෝ ඇමතුමක් හරහා නඩු කටයුතුවලට සම්බන්ධ වූ බවයි.
කෙසේ නමුත් එක් එක් නඩු සම්බන්ධයෙන් ඉම්රාන් දින 10 ක ශාරීරික රිමාන්ඩ් භාරයට පත් කරමින් විනිසුරුවරයා සිය තීන්දුව ප්‍රකාශයට පත් කර තිබුණා.
මේ අතර හිටපු අග්‍රාමාත්‍යවරයාව ඉස්ලාමාබාද් මහාධිකරණය විසින් රඳවා තබා ගැනීමෙන් පසු, ගිය වසරේ රට පුරා නොසන්සුන්තාද හට ගැනුණා.
විරෝධතා අතරතුර, සමාජ මාධ්‍ය දර්ශනවල පෙන්නුම් කළ පරිදි, ලාහෝර් පොලිස් ප්‍රධානියාගේ නිවස සහ රාවල්පින්ඩි හි සාමාන්‍ය මූලස්ථානය ඇතුළු විවිධ ස්ථාන ඉලක්ක කර ගනිමින් කඩාකප්පල්කාරී ක්‍රියාවන් සිදු වූ බවයි එම මාධ්‍ය වාර්තා පවසන්නේ.
මේ අතර අදාළ ප්‍රචණ්ඩ තත්ත්වයන් සම්බන්ධයෙන් ඉම්රාන් ඛාන්ගෙන් ප්‍රශ්න කිරීම සඳහා 13 දෙනෙකුගෙන් යුත් කණ්ඩායමකින් සමන්විත ලාහෝර් පොලිසියේ විමර්ශන අංශය ඉකුත් සෙනසුරාදා අඩියාලා බන්ධනාගාරයට ගොස් තිබූ බවත් එම මාධ්‍ය වාර්තා පෙන්වා දෙනවා.
කෙසේ නමුත් රාජ්‍යයට එරෙහිව මහජන නොසන්සුන්තා ඇති කිරීම සම්බන්ධ චෝදනා මත ඔහුගෙන් ප්‍රශ්න කිරීමට උත්සාහ කළ කණ්ඩායම හමුවීමට ඉම්රාන් ඛාන් ප්‍රතික්ෂේප කර තිබෙනවා.