උපත් පාලනයට කතුන්ට ගහන බෙහෙත සුනඛයන්ට විදලා
කාන්තාවන්ගේ ඔසප් චක්‍රය පරීක්ෂා කර උපත් පාලනයට ලබා දෙන එන්නතක් සෞඛ්‍ය අමාත්‍යාංශය විසින් සුනඛයන්ට වඳ සැත්කම් කිරීමට යොදා ගැනීම නිසා එම සතුන්ගේ ජීවිතයට බරපතළ තර්ජනයක් එල්ලවී ඇතැයි පශු වෛද්‍ය නිලධාරීහු කියා සිටිනවා.
සෞඛ්‍ය අමාත්‍යාංශය යටතේ ක්‍රියාත්මක ජල භීතිකා මර්දන වැඩසටහන ක්‍රියාත්මක කරන එන්නත්කරුවන් විසින් අයාලේ යන සුනඛයන්ට මෙම Progesterone නැමැති හෝමෝනය මෙම එන්නත හරහා ලබා දෙනවා.
මෙම හෝමෝනය යොදා ගැනෙන්නේ මිනිසුන්ගේ උපත් පාලනය සඳහා බව “මානුෂික ක්‍රම මගින් සත්ත්ව ගහන කළමනාකරණය කිරීම සඳහා වූ පශු වෛද්‍ය එකමුතුවේ“සභාපති චමිත් නානායක්කාර මහතා පවසනවා.
සුනඛයකුගේ ගැබ් ගැනීම සඳහා දින හතක පමණ කාලයක් ගතවන අතර, මුල් මාසයේදී සුනඛයා ගැබ්ගෙන ඇත්දැයි පරීක්ෂා කිරීමට නම් ස්කෑන් පරීක්ෂණයක් සිදුකළ යුතුය. මෙවැනි කාලයකදී මෙම එන්නත ලබාදීම මගින් කුස තුළ සිටින පැටවුන් මියයෑමේ සම්භාවිතාව වැඩි බවද පශු වෛද්‍යවරු පවසනවා.
සුනඛයන් කුස තුළ සිටින පැටවුන් මිය ගිය පසුව ගර්භාෂය කුණුවී එහි සැරව පිරෙන අතර,එම සැරව උදරය තුළ පැසවීමෙන් සතා මරණයට පත්වන බවද පශු වෛද්‍යවරු කියා සිටියා.
මෙය දැනුවත්ව සිදුකරන කරන සත්ව ඝාතනයක් බවත්, මෙම ක්‍රමය කිසිදු පශු වෛද්‍යවරයකු අනුමත නොකරන බවද පශු වෛද්‍ය සංගම් නියෝජිතයන් සඳහන් කරති. මෙම එන්නත ලබාදීම නිසා සුනඛයින් තැන් තැන්වල මිය යෑමේ අවස්ථාව වැඩි බවද පශු වෛද්‍යවරු පවසනවා.