ජෙප්පො විතරක් නෙමෙයි හර්ෂ වගේ අයත් කුහකයි- මනූෂ
රට තුළ ඇත්තේ හැත්තෑපස් වසරක සාපයක් නොව රටේ සංවර්ධනය අඩාල කරපු අයගේ හතලිස් වසරක සාපයක් වන බව කම්කරු හා විදේශ රැකියා අමාත්‍ය මනූෂ නානායක්කාර මහතා පවසනවා.
අමාත්‍යවරයා මේ බව කියා සිටියේ, අද (18) නුවරඑළියේ පැවති ‘ජයගමු ශ්‍රී ලංකා’ වැඩසටහනට සහභාගි වෙමින්.
රටට විවෘත ආර්ථීකය හදුන්වා දෙන විට මෙන්ම ගල් ඔය හා උමා ඔයට ව්‍යාපාරයට බිල්ලො මවනව වගේ ‘අයිඑම්එෆ්’ එකටත් ලොකු බිල්ලෙක් මවන බව මනූෂ නානායක්කාර මහතා පවසනවා.
මනූෂ නානායක්කාර මහතා සඳහන් කළේ, ඉන්දියාවට විරුද්ධව මත හදලා රටේ මිනිස්සු මැරෙන්න සැලස්සු බවත් ලංකාව සංචාරක හොඳම ගමනාන්තයක් බවට වියට්නාමය ප්‍රසිද්ධ කළ පසු එක බලකායක් සිනාසුණු බවයි.
2015 රනිල් වික්‍රමසිංහ මැතිතුමා ගත් තීන්දුවක් හේතුවෙන් දෙමළ භාෂාවෙන් ජාතික ගීය ගායනා කිරිමට හැකි වු බවත් අපේම සහෝදර ජාතියකට තමන්ගේ අභිමානයෙන් ජීවත් වෙන්න ඕන කරන ඒ අභිමානය දෙන එක සතුටට කරුණක් බවත් මනූෂ නානායක්කාර මහතා පවසනවා.
එහිදි වැඩිදුරටත් අදහස් දැක්වු මනූෂ නානායක්කාර මහතා,
රටේ තරුණ අයට රස්සාවල් තිබුණට ඒවා තරුණයන්ට ගලපෙන්නේ නෑ. අත්දැකීම් ඉල්ලනවා. ඒ පරතරය හදලා, ශක්තිමත් කරලා ව්‍යවසායකයෝ කරලා ඔබව හදන්නයි අපි මේ ඇවිත් ඉන්නේ. අපිට මතකයි මීට අවුරුදු කීපෙකට කලින් 225ම එපා කියලා දේශපාලන පෙරළියක් රට තුළ නිර්මාණය වුණා, රට කඩාගෙන වැටුණා. මේ වගේ වෙලාවක අභියෝග භාරගන්න අපිට සිද්ධ වුණා. අපිට ඡන්දෙ දීපු ජනතාව තෙල්, ගෑස් නැතුව අර්බුදයට ලක් වුණා. දරුවට නිසි වයසේ දිය යුතු එන්නත් නෑ. ඒ වෙලාවේ අපිට තීන්දුවක් ගන්න සිද්ධ වුණා. ඒ මොහොතේ මගේ ජනප්‍රියකම අමතකම කරලා වගකීම භාරගත්තා. තමන්ගෙන් පටන්ගන්න ඕන වෙනස් වෙන්න. රටට ඩොලර් එවන්න එපා කිව්ව වෙලාවක ඩොලර් මිලියන පන්සීයක් එවන්න කියන්න අපි පටන්ගත්තා. ඒ වෙලාවේ පිටරට වැඩ කරන අපේ රටේ පුරවැසියෝ හඳුන්නෙත්තිලා, ජේවීපී එක කියන එක අහන්නේ නැතුව අද බෙහෙත්, ගෑස්, තෙල්, ලයිට් ටික දෙන්න පුළුවන් වෙන විදිහට අපිට ඩොලර් එව්වා.
දේශපාලනඥයෝ දුක ගැන සංවේදී නොවුණට අපේ මිනිස්සු ඒ ගැන සංවේදීයි. විදේශ සේවා නියුක්ති කාර්යාංශය, මෙතන ඉන්න බලපත්‍රලාභී ආයතන ඒ වෙනුවෙන් කටයුතු කළා. අපේ රට අපේ ගෙදර. අපේ ගෙදර ගිනි ගනිද්දි ගෙදර ගිනි නිවන්න ගොඩක් අය ආවේ නෑ. ගොඩක් අය ගේ දාලා පැනලා ගියා. රට යන්න පටන්ගත්තා. අවුරුදු 13ක් මේ රටේ ඉගෙනගෙන, උගතුන් රට ගිනිගන්නකොට පැනලා ගියා. අපේ තරුණ පිරිසත් වැරදි මාර්ග තෝරගෙන රටවල තැන් තැන්වල අතරමං වෙලා, පිළිකනුවල හිටියා. ඒ වෙලාවේ වැරදි ක්‍රමවලට අහු වෙන්න එපා කියලා අපි ප්‍රචාරණය කළා. පිටරට ඉඳලා සල්ලි එවන ඕනම කෙනෙකුට විශාල වාහන ගන්නේ කොහොමද කියලා සජබෙ හර්ෂ ද සිල්වා අහනවා. මම හිතුවේ ජෙප්පො විතරයි කුහක කියලා. නමුත්, හර්ෂ ද සිල්වා වගේ අයත් ඒ බව පෙන්වනවා.
සිස්ටම් චේන්ජ් කරනවා කී මිනිස්සුත් රට යවනවා කියලා සල්ලි එකතු කළා.අපේ රට යුද්ධයක් තිබ්බ රටක්. වඳ කොත්තු කියලා ජාතීන් අතර අසමගිය හදපු රටක්. අපි රට දියුණු කරන්න නම් ජාතීන් එකට ඉන්න ඕන කියලා වැඩසටහනකුත් අපි පටන්ගත්තා. මේවා මම සාමාන්‍ය තරුණයෙක් විදිහට දැකපු හීන. අපිට බෑ කියලා හිටියා නම් බෑ’ම තමයි. එහෙම ඉදිරියට ගියොත් අපේ කඩඉම ජයගන්න එක ප්‍රශ්නයක් නෙවෙයි. ලෝක ආර්ථික අර්බුදය වෙලාවේ මාග්‍රට් තැචර් මහත්මිය විවෘත ආර්ථිකය ගෙනාවම ඒ රට එයින් ගොඩ ආවා. ඒත්, ජේ.ආර්. ජයවර්ධන මහතා විවෘත ආර්ථිකය ගෙනාවම ඒකට විරුද්ධ වුණා. ඒක අපේ රටේ හැටි. කුහකකම. ඒ වෙලාවේ විවෘත ආර්ථිකයට බිල්ලෝ මැව්වා. ගල් ඔය ව්‍යාපාරයට, උමා ඔයට, බිල්ලෝ මවලා මවලා ‘අයි එම්එෆ්’ එකටත් ලොකු බිල්ලෙක් මවනවා. ඉන්දියාවට විරුද්ධව බොම්බයි ළුෑණු, පරිප්පු එපා කියා පාරවල් ගාණේ ඉන්දියාව ගැන වැරදි මතයක් හදලා, ඉන්දියානු ව්‍යාප්තවාදය ගැන වෙනම පන්තියක් කරලා, ඉන්දියාවට විරුද්ධව රටේ මිනිස්සු මැරෙන්න සැලසුවා.
මේ මතවාද නිසා රටක් හැටියට ඉස්සරහට යන්න අපිට බැරි වුණා. හබැයි ඉන්දියාවට විරුද්ධයි කිව්ව අය දැන් එහෙන් මෙහෙන් ඉන්දියාවට යනවා. ඉන්දියාව අතර මිනිස් දම්වැල ශක්තිමත් කළාම තමයි අපිට ඉස්සරහට යන්න පුළුවන්. අපිට අපි විතරයි. ජාතිවාදය නැතුව අපිම තමයි වෙනස් වෙන්න ඕන. ‘සිස්ටම් චේන්ජ්’ කරන්න නම් තමන්ගෙන් පටන්ගන්න ඕන එය වෙනස් කරන්න. ලංකාව සංචාරක හොඳම ගමනාන්තයක් කියලා වියට්නාමය ප්‍රසිද්ධ කළාම එක බලකායක් ඒකට හිනා වුණා. අපේ රටට අපිම හිනාවෙනවා. ඒක අපිම ‘ශෙයා’ කළාම එය ලෝකෙටම යනවා. ඒ මාධ්‍ය භාවිතාවත් අපි හරියට කළ යුතුයි.
ලී ක්වාන් යූ සිංගප්පූරුවේ වරාය හදලා ලංකාවට ස්තුති කළා උද්ඝෝෂණ කරලා වරාය නොහැදුව එකට. එයින් ඔවුන් වරාය හැදුවා කියා. දැන් ඒ අය 75 වසරක සාපය කියලා කෑ ගහමින් රට ඇතුළෙ බිල්ලො මවමින් ඉන්නවා. රට තිබුණ තැනින් ඉතා දිගු ගමනක් ඇවිත්. ඒ කොච්චරද කියනවා නම් මේ රටේ වසර 40ක පමණ සංවර්ධනය නැවවතුවේ ඒ වසර 40 සාපය තමයි. මේ අය තමයි සාපය.”