ශ්‍රී ලංකා ක්‍රීඩීකාවෝ අපරාජිතව ඉදිරියට
2024 කාන්තා 20-20 ලෝක කුසලානයට සුදුසුකම් ලබාගැනීමේ තරඟාවලියේ අවසන් පූර්ව වටයට අපරාජිතව සුදුසුකම් ලබාගැනීමට ශ්‍රී ලංකා කාන්තා කණ්ඩායම ඊයේ (03) සමත් වුණා.
ඒ තරඟාවලියේ පළමු වටය යටතේ තමන් සහභාගී වූ අවසන් තරඟයේදී අමෙරිකා කණ්ඩායම පරාජය කරමින්.
තරඟයේ කාසියේ වාසිය දිනු ශ්‍රී ලංකා කණ්ඩායම පළමුව පන්දුවට පහර දිමට තීරණය කළා.
ඒ අනුව පිටියට පිවිසි ශ්‍රී ලංකා කාන්තා කණ්ඩායම නියමිත පන්දුවාර 20 අවසානයේදී කඩුලු 4ක් දැවි රැස්කළ ලකුණු සංඛ්‍යාව 123ක්.
විශ්මි ගුණරත්න ලකුණු 25ක් රැස්කළ අතර හංසිමා කරුණාරත්න නොදැවි ලකුණු 25ක් රැස්කළා.
ලකුණු 124ක ජයග්‍රාහි ඉලක්කයක් හඹා යෑමට පිටියට පිවිසි අමෙරිකා කණ්ඩායමට නියමිත පන්දුවාර 20 අවසානයේදී කඩුලු 6ක් දැවි රැස්කර ගත හැකිවූයේ ලකුණු 105ක් පමණයි.
විශිෂ්ඨ පන්දු යැවීමක නිරත වූ නායිකා චමරි අතපත්තු ලකුණු 14 ට කඩුලු තුනක් දවාගත්තා.
උදේශිකා ප්‍රබෝධනි සහ ඉනෝකා රණවීර එක් කඩුල්ල බැගින් දවාගැනීමට එහිදී සමත් වුණා.
චමරි අතපත්තු තරඟයේ වීරයා ලෙස සම්මානය ලබා ගත් අතර එම තරඟාවලියේ දෙවන වටයේ තරඟය හෙට (05) ඇරඹීමට නියමිතයි.
ශ්‍රී ලංකාව අවසන් පූර්ව වටයේදී එක්සත් අරාබි එමීර් රාජ්‍ය කණ්ඩායම සමඟ තරඟ වදින අතර එම තරඟය හෙට රාත්‍රී 9 ට පැවැත්වෙනු ඇති.